Banner
Nav Menu
Sidebar

Author: Ron Graham

bislama

Gudfala Laef we i No Save Finis
—Hem God i promis long yu

Samting we Kraes i promis long yumi, hemia laef ya we i no save finis (1Jon 2:25). God i promis ya long evri man we oli traehad long obei ol rul blong promes ya.

God i bin mekem wan promes long Baebol, se blad blong Jisas Kraes i tekemaot ol sin blong ol man we oli bilif long hem mo folem toktok blong hem. Nao oli kasem laef we i no save finis (1Jon 1:7, 5:11-13).

I gat trifala samting we i stap long promes blong God ya. Bambae yumi lukluk long Baebol long trifala samting ya.

1 Promes i blong evri man

Promes ya i blong evri man, mo eni man i save kasem promes ya. God i stap lavlavem olgeta man long wol ya. From samting ya, promes blong God i goaot long evri ples long wol (Jon 3:16, 1Jon 2:2).

Blad blong Jisas i save tekemaot ol sin blong olgeta man. Jon i talem se, Kraes hem i ded finis blong mekem rod blong God mekem se i tekemaot ol sin blong yumi. Be yumi mas askem wan kwestin long tok ya. ?Hem i ded blong tekemaot ol sin blong yumi nomo, o i blong olgeta man? Nao Jon i gohed i ansarem kwestin ya se, "I no blong yumi nomo, i blong olgeta man long wol" (1Jon 2:2).

2 Promes i gat rul long hem

God i bin putum sam rul long promes ya. Sapos yumi wantem se blad blong Jisas i stap wasemaot ol sin blong yumi, mekem se yumi kasem laef blong heven, oraet yumi mas stap long delaet olsem we God i stap long delaet. Yumi no mas wokbaot long tudak blong sin. Oltaem yumi mas folem trutok blong God long fasin blong Jisas Kraes. Tingting blong yumi no mas lusum tok blong Kraes (1Jon 1:6-7, 2:3-6,24-25).

3 Promes ya yu yu save lus

Man we i gat promes ya, hem i save foldaon samtaem, sapos hem i no lukaotgud long promes ya mo ol rul blong hem. Sapos man we i kasem promes blong God finis, mo biaen i gobak, i livim bilif blong hem, i foldaon bakegen, hem i nomo gat promes ya, i lus (Hibrus 6:4-6).

Taem we Pol i talem Timoti olbaot man we i kam elda blong jos, i talem olsem. "Man we i jes kam Kristin man i no longtaem, hem i no save tekem wok blong elda, from we maet tingting blong hem i go antap tumas, nao God bambae i jajem hem, olsem we i jajem Setan finis". Hemia, i soemaot se man we i kam Kristin i save lus (1Timoti 3:6).

Baebol i talem se, "Man we i ting se hem i stap stanap strong, hem i mas lukaotgud, blong se bambae hem i no foldaon bakegen samtaem" (1Korin 10:12).

?Hao nao yumi lukaotgud olsem? Yumi no mas traem stanap long paoa blong yumi nomo, nogat. Yumi mas askem God se hem i givhan long yumi mekem se yumi save stanap strong long hem. "God i stap holem promes blong hem, mo hem i no save letem wan samting i traem yumi we i strong tumas long yumi. Be stret long taem ya we samting nogud i traem yumi, God bambae i mekem rod blong yumi, blong yumi winim samting ya" (1Korin 10:13).

Sapos yumi bilif long Jisas, mo yumi tanem tingting blong yumi from ol sin blong yumi, mo yumi baptaes long nem blong Jisas, oraet nao God i tekemaot ol sin blong yumi. Bien, God i givim yumi Tabu Spirit blong givhan long yumi. Sapos yumi stanap strong long hem, oraet yumi kasem gudgudfala promes we God i givim yumi finis (Ol Wok 2:38-39).


Written in Bislama the national language of Vanuatu. Bislama is one of several creoles spoken in Australia and islands of the Pacific.


DONATE

to simplybible.com
Webservant Ron Graham


Copyright on print
Footer