Banner
Nav Menu
Sidebar

Author: Ron Graham

bislama

Jisas Kraes i Tekem Ples blong Yumi
—Blong safa panis blong ol sin

From wanem Jisas i bin safa panis long wan kros we i stanap long Kalvari? Kraes we laef blong hem i stret olgeta, hem i tekem ples blong yufala we laef blong yufala i no stret. Nao hem i ded wan taem nomo blong tekemaot ol sin blong yufala blong tekem yufala i kam long God.(1Pita 3:18)

God i save mekem se yumi harem gud, be God i save mekem i strong long yumi tu. Sapos yumi no folem toktok blong hem, mo yumi lego bilif long Jisas, naoia God bambae i kros tumas long yumi. God bambae i panisem evri man we oli no stret gud (Rom 11:22).

Hem bambae i kam blong panisim olgeta we oli no bin givim ona long God, mo oli no obei long gudnuis blong Jisas, Masta blong yumi. Panis ya, bambae i no save finis samtaem, mo olgeta we oli kasem panis ya, oli no save nating blong kam klosap long God (2Tesalonaeka 1:8-9).

1 Yumi no save rabemaot ol sin

Yumi no save karem panis blong rabemaot ol sin blong yumi, from bambae panis ya i neva kasem mak we i naf, so panis ya i stap gohed gogo i no save finis (Matiu 25:41,46).

Yu luk long tok ya, "Yufala i go long faea ya we bambae i no save ded samtaem, we oli mekem rere finis blong Setan wetem ol enjel blong hem". Ples ya, we i blong Setan, i nogat wan gud samting nating long hem, so panis long ples ya i nogat paoa blong tekemaot wan sin nating. Hemia nao, i klia se panis blong yumi long ples ya i mekem nogud, i rabis we i no save stretem yumi.

2 Jisas i karem panis blong yumi

Jisas Kraes hem i karem panis we i no rili blong hem. Laef blong Jisas i nogat sin nating, i klin gud olgeta (1Pita 2:22). "Hem i stret gud... i wan tabu man we i no mekem sam samting nogud, mo i nogat sam samting we i spolem hem" (Hibrus 7:26). Nomata Jisas i gud man olgeta, God i bin letem olgeta oli panisem Jisas finis, oli nilim hem long wan kros olsem hem i man nogud (Ol Wok 2:22-23, Ol Wok 3:14-15).

3 Jisas i tekem ples blong yumi

From Jisas i nogat sam samting i rong long hem, God i luk panis blong hem i olsem panis blong yumi, mo God i letem Jisas i safa panis blong tekem ples blong yumi (1Pita 3:18).

Jisas Kraes, we i stret Pikinini blong God, hem i gat paoa we i bitim paoa blong yumi. Hem i gat bigfala save we i olsem paoa blong Hae God, from we God i stret Papa blong hem. From samting ya, Jisas i save karem panis long ples blong yumi, mo panis blong hem i kasem mak finis we i naf blong rabemaot olgeta sin blong yumi (Aesea 53:5-6, Aesaea 53:10-11, John 3:16).

Bifo Jisas i ded, hae pris i talem se, "I moa gud blong wan man i ded blong sevem olgeta man, i winim we bambae olgeta man oli ded." (Jon 11:49-51).

4 Yumi mas obei long Jisas

Sapos yumi bilif mo obei long Jisas, yumi no kasem panis. Jisas i talem se, "God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis" (Jon 3:16).

Pita i talem se, "Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala, mo hem i givim Tabu Spirit long yufala" (Ol Wok 2:38).


[Yu luk: Samtaem yumi mas rere blong harem nogud from ol man oli panisim yumi from we yumi bilif long Jisas mo yumi no lego. Nao panis ya, i no panis we God i mekem, be panis ya i panis we ol man nogud oli mekem. Taem we yumi safa panis ya, i olsem we yumi serem panis wetem Jisas. Yumi kasem haf blong safa blong hem, from yumi stap fren blong hem. Nao God bambae i blessem yumi from. God bambae i panisim ol man nogud ya.]


Written in Bislama the national language of Vanuatu. Bislama is one of several creoles spoken in Australia and islands of the Pacific.


DONATE

to simplybible.com
Webservant Ron Graham


Copyright on print
Footer