Banner
Nav Menu
Sidebar

Author: Ron Graham

bislama

Sid we Man i Planem
—?Sid blong pastek i save mekem pamken?

Sapos yu planem sid blong pastek long garen blong yu. Sid ya i no save mekem pamken, i save mekem pastek nomo. Baebol i talem se, Wanem sid we man i planem fastaem long garen blong hem, be frut blong hem nomo, man ya bambae i mas kakae (Galesia 6:7)

Long Vanuatu i gat plante defren kaen jos o skul. Nao ol man oli wosip Kraes long ol defren fasin. Oli tijim ol defren samting tu. Be Jisas hem i stanemap wan skul nomo fastaem, klosap long 2000 yia i pas finis. Mo long sem taem i givim Niutesteman we i joenem hem long en blong Baebol. (Niutesteman ya, i gat 27 buk long hem, i stat long Matiu, i finis long Revelesen). Long evri Baebol, Niutesteman ya i sem mak nomo.

1 Toktok blong Kraes, i olsem wan sid

Nao Niutesteman ya, i olsem wan sid. Taem Jisas i talem parabol long man we i planem sid, (Luk 8:4-8), i talem se "Sid ya, hemia tok blong God" (Luk 8:11). Sid ya, i save mekem wan kaen skul nomo, i no save mekem narafala. Sid ya, i save mekem wan kaen Kristin man nomo, i no save mekem ol narafala kaen.

2 Ol defren sid oli mekem ol defren samting

Sapos yu yu planem sid blong pastek long garen blong yu, bae yu save kakae pastek. Be sapos mi mi planem sid blong pamken long garen blong mi, bae mi save kakae pamken. Yumi gat defren kakae from yumi bin planem defren sid.

Long Vanuatu i gat plante defren kaen jos o skul. ?Olsem wanem? I gat ansa i stap long Seken Jon vas 9. "Man we i ova long mak blong ol tijing blong Kraes, nao i joenem sam moa tok bakegen we i kamaot long tingting blong hem nomo, God i no stap laef long hem." Man ya, i planem defren sid, taswe i mekem defren jos. Man ya, i no mekem jos olsem we Jisas i mekem, from man ya, i no planem sem sid we Jisas i givim long hem.

3 Ol sid we oli sem mak nomo, oli mekem sem samting nomo

Sapos yu yu planem toktok blong Niutesteman long hat blong ol man long vilej blong yu. Nao yu no joenem tingting blong yu long tok ya. Nao sapos mi mi mekem sem samting long vilej blong mi. Yu ting se yu yu mekem wan Presbyterian jos, mo mi mi mekem wan SDA jos? O yu ting se yu yu mekem wan AOG jos be mi mi mekem wan Katolic jos? !Nogat! From yumi planem sem sid, yumi mekem sem samting.

Jos we yu mekem long vilej blong yu, mo jos we mi mekem long vilej blong mi, tufala jos ya i sem mak olgeta, from tufala i kamaot long wan kaen sid nomo, hemia Niutesteman blong Kraes. Nao tufala jos ya we yumi mekem, tufala i olsem jos we Jisas i mekem samwe long 2000 yia i pas finis.

4 Yumi no mas jenisem toktok blong Kraes

Long en blong Niutesteman i talem se, "Sapos man i joenem sam tok long ol tok blong buk ya..." God bambae i panisem man ya. "Mo Sapos man i tekemaot sam tok long ol tok we God i givim, we i stap long buk ya..." God bambae i panisem man ya (Revelesen 22:18-19).

Kraes i givim wan Niutesteman nomo, nao kopi blong yu mo kopi blong mi tufala i gat sem toktok long hem. Niutesteman ya i soemaot wan skul nomo we i stap long taem bifo. Mo Niutesteman i save mekem sem skul nomo long tede. Skul ya i kasem sem mak olsem skul we i stap long taem bifo. Niutesteman ya i soemaot wan kaen Kristin man nomo, mo Niutesteman ya i save mekem sem kaen Kristin man long tede. I no save mekem narafala.

Naoia, yumi mas planem sid we i stret gud long ol hat blong ol man Vanuatu. Mo yumi mas bilif mo obei long gud sid ya nomo.


Written in Bislama the national language of Vanuatu. Bislama is one of several creoles spoken in Australia and islands of the Pacific.


DONATE

to simplybible.com
Webservant Ron Graham


Copyright on print
Footer