Banner
Nav Menu
Sidebar

Author: Ron Graham

bislama

Han blong God
—i mekem, sevem, mo helpem yumi

Baebol i samtaem tokbaot "han blong God" mo wanem han blong God ya i save mekem. Long lesen ya, bambae yumi tingbaot trifala samting we han blong God i save makem.

Be fastaem mi tok smol longsaed blong God we hem i spirit nomo, nao i nogat han olsem man. Jisas i talem se, "God hem i Spirit" (Jon 4:24). Nao tu, Jisas i talem se, "wan spirit i no gat mit mo bun blong hem," (Luk 24:39).

Naoia, Tok ya, "han blong God", hem i min se paoa blong God. God i nogat han blong mit mo bon, be God i gat han blong bigbigfala paoa blong mekem eni samting we hem i wantem.

Han blong God i gat Paoa

“Hae God i God blong yumi, mo hem i mekem Jodan Reva i drae blong mekem rod blong olgeta, nao i holem i stap olsem gogo olgeta evriwan i kamkros long saed ya. Hem i mekem stret olsem we i mekem Red Si ya i drae bifo, nao ol olfala blong yumi oli kamkros long hem. From ol samting ya we hem i mekem, olgeta man long wol bambae oli save we paoa blong [han blong God] hem i bigwan tumas, mo bambae yumi save ona long hem oltaem, gogo i no save finis!” (Josua 4:23-24).

1 Han blong God i Mekem Yumi mo Olgeta Wol ya

I gat wan God we bifo bifo i mekem graon, mo olgeta samting we i stap long graon ya. Mo tu hem i mekem solwota mo dipsi, mo olgeta samting we i stap long solwota ya. Mo tu hem i mekem skae, mo olgeta samting we i stap long skae ya.

Nao God ya, we i putum olgeta samting, hem i mekem man mo woman. Olfala ya, tufala i bin kam mama mo papa blong olgeta man. Laen blong tufala i stap bifo bifo, naoia laen ya i kam daon blong kasem yumi mo evri narafala man mo woman. (Jenesis 1:1-31, 2:1-2).

Paoa blong God ya i antap olgeta, i winim paoa blong evri narafala god o spirit. Mo God i gat wan Pikininy, Jisas Kraes, we paoa blong hem i stap sem mak blong God we i Papa blong hem.

"Kraes ya, yumi save luk hem. Hem i sem mak long God we yumi no save luk hem. Hem nomo i stret Pikinini blong God, mo hem i stamba blong olgeta samting we God i mekem..." (Kolosi 1:15-20).

2 Han blong God i Sevem Yumi blong Panis from Sin

Baebol i talem se God i stap sevem yumi long gladhat blong hem (Efesas 2:8-10). God i bin sanem pikinini blong hem we hem i ded long kros, mekem se God i save savem yumi mo han blong hem i save tekemaot ol sin blong yumi.

Tu, God i givim yumi promes blong laef. Nao laef ya i no save finis, nao God i holemtaet laef ya long han blong hem long heven (Jon 3:16, 1Jon 2:1-2).

Baebol i talem se, “Hae God. Yu yu stap blokemgud mi, yu stap sevem mi, nao mi mi stap gud long han blong yu. Fasin blong yu we yu stap givhan long mi, hem i stap leftemap nem blong mi. Yu yu bin lukaot gud long mi blong ol enemi blong mi oli no holem mi,nao mi mi no foldaon” (Sam 18:35-36)

Sapos yu wantem we God bambae i nomo kros long yu, mo han blong hem i tekemaot olgeta sin blong yu, Jisas i talem se man we i bilif long guid nius blong Jisas mo we i baptaes, God bambae i sevem hem. (Mak 16:16).

3 Han blong God i Helpem Yumi long Hadtaem

Long taem blong trabol i kam, tingting blong yumi go daon, mo hat blong yumi soa. Yumi harem fraet, konfius, mo sore. Yumi tingting hevi. Be i nogud moa, from tingting blong yumi stikim yumi mo i jagem yumi. Nao samting ya i hevi tumas blong karem long hat blong yumi nomo.

Be gudnuis i stap, se God i gat paoa blong helpem yumi. "Bambae mi mi no save livim yu yu stap yu wan. Bambae mi mi no save lego yu samtaem. Nao from samting ya, yumi save mekem tingting blong yumi strong blong talem se, 'Hae God i stap givhan long mi, nao bambae mi mi no save fraet. Man i no save mekem wan samting blong spolem mi.'" (Hibrus 13:5-6).

Bambae God i save helpem yumi olsem we hem i helpem David finis, i King blong Israel. Hem i talem se, "Hae God i stap lukaot gud long mi olsem we mi mi sipsip blong hem, nao mi no save sot long wan samting" (Sam 23:1).


Written in Bislama the national language of Vanuatu. Bislama is one of several creoles spoken in Australia and islands of the Pacific.


DONATE

to simplybible.com
Webservant Ron Graham


Copyright on print
Footer